當一切循環

繼三哥苗僑偉返 TBB 拍劇後，連三嫂戚美珍也回巢了。
前陣子久未露面的陳玉蓮、周海媚也回娘家拍劇。
超人就想，嘩，廿幾年前的花旦又回來了，咁快就一個循環。
但原來，一個循環唔駛廿幾年咁~~耐！
早兩日睇報紙話陳慧珊回 TBB 拍劇 part 馬德鐘，數一數手指關詠荷同郭晉安拍緊「五味人生」、蔡少芬同陳豪拍緊「飛女正傳」、宣萱同林保怡拍緊「掌上明珠」、張可頤同三哥拍緊「老公萬歲」、郭可盈同呂良偉拍緊「富貴門」，現在加埋 Flora，千禧盛世前後的 TBB 花旦竟然全體回巢！
十年已經一個循環，快到你唔信。
金融海嘯，咪就係搞到世界難撈咁解囉。