最受歡迎男歌手

一向都有睇下「勁歌」總選，今年卻完全沒有印象是哪天舉行。
沒辦法，去年Eason「夕陽無限好」、「落花流水」、「浮誇」、「阿牛」等首首好歌，最後仍然失落最受歡迎男歌手，立時好厭倦呢個造馬頒獎典禮。我知無記係偏幫李克勤，契仔嘛，我都唔計較，但係竟然連「金曲金獎」都唔係「夕陽無限好」而係「無賴」，我就真係覺得無記無賴得太過分。造馬都唔好造到咁離譜丫。Eason在TVB仍然執迷頒「最受歡迎男歌手」俾劉德華的時候就已經有資格拎這個獎有餘。你話「最受歡迎」唔同「最佳」，所以Eason最唱得唔等於佢有獎，好，我就唔同你計唱成點。咁劉德華唱的歌有幾多人識先？佢04年得獎的「按摩女郎」我連聽到未聽過，去K亦都從來冇人點過；李克勤上年得一首「情非首爾」叫做hit少少就算最受歡迎？無語。「無賴」多人識定「夕陽無限好」多人識，相信大家心照。無記一向虧待Eason，睇下今年Eason拿獎之後各大傳媒、網民、歌手個個都有同一個comment，就係「Eason一早應該拎呢個獎。」「一早」呀，請無記反省一下啦！係，你要頒俾劉德華、李克勤我都冇符，畢竟只係一場鬧劇，正如「最佳男主角」頒俾鄭嘉穎，我都冇野好講，不過做大台做到咁，俾人xyz囉。
今年唔睇總選Eason就得獎，少少遺憾，但仍衷心恭賀Eason，呢個獎，你應得的！