給TVB的信

有消息流傳話翡翠台子夜場播完「隔世追兇」後會播「陀槍師姐」系列。
嘩，真係好似有TVB節目部高層睇我呢個blog咁，好正呀！有求必應呀！
既然係咁，我一次過講哂我D意見出黎先得！
給我最敬愛的TVB：
我呢，睇過少少「突圍行動」，覺得思琦姐做奸角真係好唔得囉！可唔可以少D起用佢呀？我知佢係鼎爺新抱仔，要俾面，唔係拍騎馬戲少緊個人做導師。咁一係你直接將個角色分俾鼎爺演丫，可以安排佢唔係同徐子珊爭吳卓羲，而係同岳華爭米雪架嘛，OK架喎，同樣演「扮豬食老虎」，我相得過鼎爺比較有潛質。
另外呢，我覺得呢幾年D港姐真係好醜樣，徐子珊其實係咪參選港男但係額滿所以轉而扮女人參選港姐架？照計我點睇佢都唔似女人喎……我係TVB忠實fan屎，請放心，我唔會將個真相唱開去架！
呀，仲有呢，我想問宋芝齡係咪高層關係人士呀？點解一日到黑都見到佢既？仲有南韓旅遊發展局其實係咪暗中sponsor「東張西望」？即係本身個節目名係「南韓旅遊發展局獨家呈獻—東張西望」？點解日日都要報導一班韓國「暗星」既？反正都係報導「暗星」，不如報導蔡燶華、毒瘤明近況好過啦。
仲有呀仲有呀，我想私底下問下各位高層係咪真係覺得你地班電視台哥仔姐仔唱歌係「OK」架？拿，唔好講違心野。你地自己開電視聽到吳卓羲唱「別怪她」、陳豪唱「心花放」、佘詩曼唱「黃沙中的戀人」，係咪真係唔會轉台先？
本來仲有好多野想講，不過怕浪費各位高層時間，都係留番下次先講。
謹祝TVB日後製作更多好節目，個個藝員都聽教聽話，有如親生仔女！
並祝六叔長命千歲，六嬸青春常駐！
p.s.如果總經理陳志雲睇到小妹呢篇真情剖白，我想話佢知我好鍾意睇佢架！支持Steven！支持煲呔！支持酒「nup」！
對TVB一直不離不棄的忠實觀眾上