徐步高 vs 鄭伊麵

眾所周知行運超人非常討厭鄭伊麵，與泳兒屬同一個層次，就是「見一次鬧一次」。
「東張西望」內見到鄭生，想不到這次超媽比我更快出口：「都唔知佢有乜咁好，又唔係靚仔……」
超人立即回應：「樣衰添啦直頭！」
超媽繼續牢騷：「慘得過有咁多女人鍾意佢，又話奪麵雙琪，又話蒙麵戀。你睇佢而家剪埋個陸軍裝，仲肉酸，成個解放軍咁……」
超妹亦都加入戰團：「成個徐步高咁樣就真。」
誰知超媽立時反駁：「乜呀，徐步高好樣過佢咁多！」
「吓？」超人和超妹以為自己聽錯。
「哎呀，你而家知道徐步高做咗啲咁嘅嘢就梗係話佢唔好啦，如果佢唔係奸嘅，佢唔好樣過鄭伊健多多聲？」看超媽的樣子，她絕對是真心覺得警魔比伊麵順眼得多的。
「都，都係。」兩姐妹笑個不停。
原來超人痛罵了鄭伊麵那麼多年，還不及超媽一個比較來得痛快。
「連徐步高都好樣過你呀，鄭伊麵！」