天大 Dilemma

救命！真是一個極大的 Dilemma！！

「火影忍者」Wii Game，買還是不買呢？

行經旺角信和發現Wii「火影」最低價為$250，極‧抵‧買…… 行運超人的思潮起伏如下：
天使：「買啦，咁平，由初出 $360 減到而家 $250 喎，仲唔買？」
魔鬼：「嘩，出咗唔夠兩個月跌價跌超過三成，買唔買得過先？」
天使︰「咁因為無人識火影啫，唔代表隻 game 唔好玩呀。」
魔鬼：「但咁跌法會唔會再跌呢？」
天使：「So far 都冇見過 Wii game平過 $250 啦，唔會點蝕呱。」
魔鬼：「但係呢個 game 係疾風傳喎，距離無記播緊嘅動畫相差二百集，啲人物行運老公唔識，佢唔會肯玩架。」
天使：「老公唔玩行運超人玩囉，反正超人已經偷看了疾風傳，知道故事同人物。」
魔鬼：「超人玩？啲網友話火影個game好似龍珠喎，後者超人都玩唔掂。況且冇咗老公刨說明書，超人點會識出招？」
天使：「咁…… 買咗唔識咪再等老公遲啲教囉。」

魔鬼：「但有網友話火影唔夠龍珠好玩喎，龍珠耐玩好多。」
天使：「車，行運超人都唔鍾意玩龍珠嘅，如果火影同龍珠一樣 “咁好玩”，咪仲唔值得買？」

魔鬼：「講到尾行運超人一個人點打呀？又唔夠電腦打，老公又因為唔想偷步知道劇情而唔會打。再者真係冇乜人喺 discussion forum 講呢隻 game，唔識玩都叫天不應、叫地不聞，又或者直頭可以 assume 隻 game 跟本唔好玩，所以冇人講。」
天使：「但唔玩過點知好唔好玩喎。Cooking Mama 夠貴啦、夠多人講啦，但行運超人覺得唔係咁好玩，至少超人點都唔會買。打機係講個人喜好，行運超人鍾意火影話唔定對個 game 會加分呢。」
魔鬼：「咁如果唔好玩，$250 付諸東流，行運超人係咪 pat pat痕攞嚟衰呀？」
天使：「但係行運超人真係好鍾意火影忍者喎。況且如果個game真係唔好賣，信和舖賣完唔會再番貨。」
咁，點算好呀？

「火影忍者」Wii Game，買還是不買呢？