Mr Brain

«House» Season 5 大結局，又要等到今年九月至有得睇。
呢季 Huddy 搞咗咁耐，到頭來得個吉。
不過都好嘅，話哂都等咗咁耐，發展得太快又會冇哂趣味。
完咗 «House» 一心諗住開波煲 «Fringe»，點知有晚同老公喺 Pearl 睇咗一集佢竟然罕有地話好睇要一齊煲，而家唯有 hold 住等埋佢。
«Without a trace» 跟得幾集又甩咗，美劇而家得番 «Ugly Betty» 獨挑大樑，唯有開拓日劇新資源。
23/5 木村拓哉進駐「土8」，新劇 «Mr Brain» 睇故事大綱同伽俐略有九成相似，都係神探科學家、年輕貌美女助手、千奇百怪案件加超級強大串星陣容。上次大口仔露股參演伽俐略，唔知今次駛唔駛派草彅剛露雀支持 Mr Brain 喇。
睇宣傳已知有小雪同龜梨和也客串，卡士都算唔錯。
女主角綾瀨遙人氣爆燈，近一年來任何時間行過報攤都見到至少一本日本雜誌以佢作為封面，加埋日劇、電影、CM，喺日本真係日日都見到佢。
由寶礦力水著少女到乾物女到成為當紅「姐仔」，超人都可謂睇住綾瀨遙成名。
其實綾瀨遙個樣認真麻麻，不過熒之光就實在演得唔錯。
反正除咗上野樹里我又真係唔覺得有邊個姐仔才貌雙全，澤尻英龍華同長澤正美兩大死對頭咪一樣唔靚，啲戲仲屎過綾瀨遙好多，宮崎葵、堀北真希、蒼井優啲戲比較好，但個樣時靚時唔靚咁都好飄忽，所以綾瀨遙紅都算係合理。
何況日本一線女星好多時都唔係頂級大美人。松隆子成個包咁邊算係靚；菜菜子同竹內結子好似樣，但都唔係大美人嗰類；常盤貴子、廣末涼子、小雪、深津繪里就更加談唔上樣貌秀麗；柴咲幸同深田恭子啱啱紅嘅時候唔錯，後來又唔係好得。
真係生得五官標緻又可以做到首席女星嘅印象中係得中山美穗、酒井法子同仲間由紀惠寥寥幾個。伊東美咲同N年前嘅國民美少女後藤久美子都好靚，不過佢哋又唔係紅到「首席」嘅程度。
到現時為止仲間都仍然好紅，等佢唔再「首席」嘅時候，希望就係野田妹上野樹里接棒之時，因為樹里真係好可愛。
Anyway，唔好岔到冇雷公咁遠。
講番 «Mr Brain»，木村呢次正面挑戰福山雅治，單睇廣告就覺得二佬之前嘅伽俐略造型正啲，官仔骨骨咁，木村個髮型總係令超人聯想到 Gabsby 廣告。
期待 23/5 睇完第一集之後再分高下。