若要人不知，唔好太低B

日日都評「烈火3」有幾差，其實都真係幾煩。
不過唔評，又不吐不快。
尋晚以為阿成會醒，睇左最後兩節烈3。
本來諗住陳展鵬個角色會玩弄一下姚子羚，順帶蹧躓一下鄭嘉穎。
誰知……車！跟「天鵝」一樣，有頭威冇尾陣，一轉眼便已被神化英雄卓柏宇幹掉！
整個「鵬Sir」出來原來仍是用作襯托卓柏宇的英明神武，認真「多舊魚」。
睇得兩睇以為有火災場面，點知原來係阿成留醫嗰問療養院四級大火。
一睇超人已經笑咗。
都已經俾人唱衰做錯決定，好兄弟又勾義嫂，個老豆又手指拗出唔拗入……哈！而家竟然衰到昏迷緊，間療養院都會火燭！
四級火喎！燒到嘉禾大廈咁濃煙！
真係冇辦法唔笑！
睇住成班低B仔走火，走走下連阿成個維生儀器條氣喉都 kick 甩埋，真係笑到超人標眼水！
頂佢！個劇本真係兒戲到冇朋友！
卡通程度誇張程度好似睇緊「皆大歡喜」(仲係古裝版) 咁！
「王老虎搶屎」都好誇張，但人哋擺明車馬係鬧劇，你「烈火雄心3」自稱講述一班無名英雄點樣救人自救，唔好咁兒戲得唔得？
索性安排走走下火喺樓梯 kick 親阿成飛咗落街但係神人卓柏宇一掌打番佢上房仲救咗阿成一命啦笨！
卡通到好似「家有喜事」咁好唔好？
如果唔係班編劇低B，就一定係班編劇當我哋觀眾低B！
下次哪位朋友埋怨自己「頭頭踫著黑」，請想起鍾有成，包保你笑番。