唔記得lu

超妹係 Dan Brown 粉絲，本本 Dan Brown 作品都話好睇好睇。
超人睇完「Da Vinci Code」又真係覺得唔錯，之後就問超妹借左本「Angels & Demons」，不過借左好耐都未睇。
呢D都係後話。
話說超妹從歐洲流浪歸來，急不及待去咗睇 Angels & Demons。
睇完當晚打俾我，話套戲好好睇，不過有啲唔明。
超人忍唔住質疑，你睇完原著都唔明？
妹妹一輪咀講咗幾句，都係後話。
超人大致上解答咗超妹的「疑團」，二人開始吹水。
超妹：「個神父做得好好呀。」
超人：「係呀，伊雲麥格高吖嘛，做得好搶鏡。」
超妹：「唔識佢呀，總之好鬼鍾意神父，所以最後睇到佢原來奸好難過呀…」
超人：「……你……睇過原著架喎，你唔知佢係奸咩？？」
超妹：「唔記得 lu！」
超人：「吓？佢係全個故事最奸一個喎！咁大個 Twist 你唔記得？！」
超妹：「嗯……(唔知係咪俾我「chot」親，有D尷尬) 記得好似有個人係估佢唔到奸架囉，不過唔記得係邊個 lu……」
超人：「……」
超妹：「我睇完戲番黎想睇番本書架，不過本書又唔喺屋企。」
超人心諗：串我添喇！
超妹︰「總之就好睇啦……」

超人成日話，超媽年紀大咗好可能會似超婆咁可愛，而家我話超妹可以繼超婆超媽之後成為第三代繼承人。
呢個妹……真係俾佢笑死。

李長治

真係要封梁洛施做偶像！
此女年紀輕輕，得二十歲，但聰明絕頂。
大家都說徐子淇像童話公主，我不反對，不過她的父母苦心經營這個女兒，她成為公主是幸運但不是奇蹟。
但梁洛施能生下李嘉誠的男孫，則完完全全是個奇女子奇情奇遇大奇蹟。
她本人自是長得漂亮，人也想必聰明，自小受盡苦難，她比溫室小花們明白甚麼是現實。
她小時候運歹，到了今天卻把二十年的運氣都贏回來。
一索得男。
澤鉅的太太富信(忘了她現在的名字)可是大戶人家的女兒，生了四個才生得出男丁。
生得出，也趕不上追多個。
公主子淇生了兩個都是女兒，雖然年紀還輕，要追還有日子，但哪裡有 Isabella 那麼定過抬油？
當「大劉」都有那麼多女人爭著為他生子，無名無份在所不計，香港的女士們，請不要告訴我你們不屑為李嘉誠添個男孫。
Isabella，好野﹗

後話：李超人替男孫取名「長治」，意解「長治久安」？還是李超人跟超人一樣是「火影忍者」迷(長治是其中一個角色，是主角的同學仔)？下一個男丁會否取名「鹿丸」或「鳴人」？哈哈。

富田靖子

同伽俐略以及 Mr Brain 一樣，Boss 每集都有 Guest Star 飾演兇手。
不過同前兩者唔同，後者的 Guest Stars 唔係廣末涼子、小雪呢種一線紅星，而係比較「實力派」的星級人馬。
例如有兩集請來好鬼好戲的山田孝之客串，山田個造型遮遮掩掩咁，唔係做足兩集超人真係唔認得係佢。
話題之作當然要數「天才子役」志田未來繼「女王的教室」後「重遇」天海祐希。
另外有集由富田靖子客串，超人都算叻，第一個 shot 見到就叫得出富田靖子個名，須知道呢位過氣富士首席女星都真係沉左好多年。
超妹成日笑我係香港藝壇人肉資料庫，well，原來我連日本藝壇都ok喎！
其實廿年前超人都幾鍾意富田靖子，無記播過佢主演的一套日劇叫「新紮俏警花」(當然係香港譯名啦)，富田個角色叫「早見香里」，當時超人不知幾迷香里。
不過歲月催人喇，富田家陣已經40歲，早就唔再「得意少女」。
當酒井法子都只可以飾演小丸子亞媽的時候，富田仲有咩好講丫，唔係人人好似天海女王咁奇葩嘛。

Boss vs Mr Brain

睇左兩集 Mr Brain，雖然日本視聽率有22%，但暫時感覺只係中上之作，談唔上好好睇。
唔知係唔係心理作用，我覺得木村呢個「九十九龍介」角色唔係咁 charming。
造型古古怪怪、頭髮蓬鬆、個人又好唔入世咁。
同埋啲案真係好鬼兒戲，破綻咁多，駛鬼用到腦科學咩，係人都破到案啦。
而且木村同綾瀨真係好唔 match，唔似兄妹，唔似同僚，更加唔似情侶。
木村係型仔，不過都有番咁上下年紀，仲配一個廿幾歲年青少艾俾佢，只係彰顯出佢年紀大。
相比之下同期由天海祐希、竹野內豐主演的 Boss 更加好睇。
同樣係警察查案劇、講主角點樣一夫當關智擒兇手，Boss 的劇情似乎緊湊D。
更重要的是 Boss 的人物角色 charm 好多，個個角色都好特別。
最正當然要數風流有型參事官助理竹野內豐，睇佢喺呢套劇個樣好似仲後生過以前，真係靚仔到癲。
以前睇 Death Note 因為有松山研一的光芒掩蓋，覺得戶田惠梨香演出只係一般，但係今次再睇又幾ok喎。
唯一投訴係天海女王的戲份太多，雖則佢係第一主角、係 Boss，但係既然個個角色設定都咁突出，唔駛女王咁多大頭獨腳戲呱…
唔好搞到竹野內豐好似大配角咁啦。

Btw，我覺得連個 opening 都係 Boss 好睇過 Mr Brain 好多。