疑似女醫生買唔起樓事件

特首推施政報告上電台解畫，有自稱任職醫生的女士投訴跟任職律師的丈夫合力仍供不起樓云云。

超人一聽，爆笑。

誠然香港的樓價已經飊升得過了分，超人也希望樓市可以稍稍喘定讓真正有心買樓的人負擔得來。

但相對地，這位女聽眾「吹水」也是過了分。

醫生加律師少說月薪十萬，一上車便要買名鑄、天匯當然力有不逮，但要買四、五百萬的樓應該綽綽有餘。

當然，如果硬要投訴一上車五百萬樓三成首期百五萬現兜兜不易負擔，「疑似女醫生」大可以二按借夠九成。

兩口子專業人士如果連五十萬也付不起，我覺得不是特首、政府、香港社會的錯。

就算你過往真的「駛大咗」，今日起才開始儲蓄，醫生入職薪酬計你六萬，律師入職計你四萬，就當你兩個各自要養家、要置裝、要食、要住、要買名牌，一個月加埋都應該儲到三成，一年就儲到三十六萬，年半點都儲到一成首期。

如果兩口子負擔少啲或節儉啲，每月儲到半份糧 (大家唔好忘記搵一萬要儲五千當然 mission impossible，但搵十萬儲五萬就真係唔係好難)，計埋交稅一年都已經儲夠首期。

更重要的是，人生於世「冇咁大個頭唔好戴咁大頂帽」。

即使你唔認同「量入為出」呢種經濟原則，至少都應該贊同由細到大阿媽教你「睇餸食飯」。

如果真係負擔唔起，買遠啲買細啲先上車又何妨。

新界區如果肯俾到四千蚊呎好盤已經多到暈，兩口子買個八百呎大單位三房兩廳兩厠所寬敞到翻筋斗都得。

四八卅二都不過係三百幾萬！

你話新界區唔得喎唔近番工(我又真係唔知原來咁多醫生番中環，新界咁多區冇醫院嘅)，咁奧運站算係九龍中心啦，呎價七八千好貴咁你咪揀五六百呎囉，兩個人，其實五六百呎兩房可以接受啦，五百萬埋到單都算係咁。

俾得起首期，之後供樓就更容易。

Mortgage 此東西，你嫌供得多可以供耐啲，供夠三十年，每月供幾萬，頭幾年要供二按自然辛苦啲，但疑似醫生和疑似律師年年加薪，過得六、七年兩口子搵成十幾廿萬一個月，足夠換幾次樓。

至於名鑄、天匯此等豪宅，人哋起出來不是預算你兩個「區區」專業人士買的。你們買不起，合理過合理，有甚麼好投訴。

好比投訴百幾萬一個手袋你係醫生都買唔起。大姐呀，你「區區」醫生學乜鬼人買百幾萬嘅手袋先得架？你買得起，甘比、呂麗君、陳振聰太太買咩呀？

所以超人覺得此女打電話上電台插特首無疑其志可嘉，但人頭豬腦、見識淺薄、吹水唔抹咀未免丟人現眼。

超人信得過醫生的質素並未淪落至此。

所以，港女有心人，奉勸你下次吹自己係銀行從業員，話金融海嘯後生意難做，老公做 big-4 又要放 no-pay，而家連銀行低息做 Mortgage 俾 staff 你哋都冇信心買樓，繼而投訴政府呢樣唔好、嗰樣唔好，咁咪 re 啲囉。

恭賀高錕先生

歐遊回來，得悉「光纖之父」高錕先生獲得今屆諾貝爾物理學獎。
高錕先生近年患上老人癡呆症，甚至連畢生心血發明–––光纖，都不復記起。
然而從報道中看到高錕先生的現況並不可憐。
他雖然記不起很多事情，甚至連話也說得不大清楚，但他充滿稚氣的笑容告訴我們：他活得很快樂。
高太太黃美芸女士是位了不起的女性，年青的時候陪伴丈夫進行科學研究，晚年老伴患病，她仍堅強面對、照顧丈夫無微不至。
高錕先生現在的生活很依賴高太太，就像一個小孩子需要母親的照顧一樣。
高錕先生和夫人的故事很感人，不知怎地看著看著超人就哭了。
也不知怎地，腦海中總想起張學友的一首舊歌。
送給遙遠的高錕先生和夫人。

「……同行共領會人世道理，假使一天不再飛，到公園中散步年紀，有老伴仍是你。」
有個人 by 張學友