目不暇給

早排乘歐遊之便開始學人研究錶。
雖然只是 BB 入門 Level，不過都覺得幾有興趣。
好就好在靚錶呢家嘢隻隻都精緻到令人目眩，就算只係初哥階段，咁多靚錶都好鬼養眼。
超人亦漸漸明白點解有咁多人去學珠寶鑑證。撇開學曉一門學問不談，淨係睇咁多珠光寶氣又夠開心啦。
就算買唔起，日日見住啲極品靚嘢總好過見住啲你又唔明佢佢又唔明你嘅圖表或文字。
講番錶，呢排最有人氣一定係 IWC，請咗 Zidane、Rain 同陶喆賀 1881 Heritage 旗艦店(號稱係 IWC 全球第一間 flagship)開張大吉。
加上「富貴門」中成為撈家及靚靚嘅「定情信物」，隔兩集就見隻鑲鑽 Portuguese Chronograph 或者個錶盒 close up。
可能係搵過「動 L」做代言人嘅關係，聞說 IWC 都有唔少內地客捧場。
不過其實都估到，IWC 平時都係走踏實低調路線，今次搞咁大噱頭，班內地客有幾重要可想而知。
賣貴價貨嘅唔到你唔低頭，而家歐美經濟唔好，唔靠中國客點賺大錢？
廣東道一眾國際品牌開 flagship 開到癲咗，LV 大大間、A/X 大大間、Rolex 大大間，連 H&M 都開到百貨公司咁大。
無他嘅，自由行個餅咁大，唔分番份你就笨。
講番 IWC，超人都幾鍾意 Portuguese 同 Pilot Classic 系列，不過除咗貴另外有個問題就係佢啲錶款好鬼大隻，超人手幼實在 carry 唔到。
之前亦認真諗過買 Chanel 隻 J12，不過入到 shop 玩咗實物一輪又覺得唔夠雜誌見到咁靚。
以前冇乜點留意 Panerai 同 Franck Muller，認識咗原來都好鬼型。
總之呢個世界，有錢就大把嘢玩，慾望無窮可恨銀紙有限。
所以你話呢，邊個唔想做卓一鳴先得架？

註：網上見到 TBB 周刊幅相，驚覺撈家同靚靚好鬼襯之餘瞥見靚靚手上的 Cartier Crash。嘩，戴親都係靚錶，幸福到震……

Yatming

其實，如果觀眾一開始唔知道沙富來並唔係卓一鳴嘅話劇情會唔會仲好啲？
唔知點解，見到沙富來隨時隨地以好感性地以卓一鳴身份講一大堆說話我覺得佢太「神」。
我明白佢係老千，但，一個咁大嘅大話講起上黎要瞻前顧後串連上文下理，佢真係唔可能講到咁人人信服。
雖然編劇近幾集已經好盡力舖排沙富來係一個好聰明嘅人，但在我呢個觀眾看來都係好奇怪。
睇佢次次講到自己身世都眼泛淚光，原本應該好有感染力，但因為一早知佢係講大話，就會覺得佢好卑鄙。
幸而羅嘉良演技真係好唔錯，好多細微嘅感覺佢都表現到。
如果佢個樣唔係咁殘，同靚靚一對相信會令人睇得仲舒服。
馬德鐘唔係唔型，不過一拼埋撈家度，唉，演技確係高下立見。
其實今年台慶，無論係柴九定撈家做視帝我都覺得合理。
不過既然撈家都贏過三次，俾柴九贏仲開心啲啦。