小虎隊與溫兆倫

超妹要求超人寫篇 blog 品評一下遊戲節目「大古lone」。
都唔係唔想寫，而係節目的片段在腦海浮現，立時火起，要寫還得整理一下浮躁思緒。
呢期小虎隊無端端重現江湖，又攪簽名會又開演唱會。
林利哥哥之前參演「學警」重現公仔箱，演黑道大佬都幾有新鮮感。
超人無聊上 Youtube 睇佢以前的演出片段，赫然發現佢有份參演廿年前超人好鍾意睇的「我本善良」。
雖則話鍾意睇，講真超人對套劇已經無咩印象，除咗記得有溫兆倫、邵美琪、曾江同羅樂林四個主角之外，劇情細節就唔多記得。
林利同溫兆倫係同屆新秀出身，即係第一屆，梅姐嗰屆，睇番原來同劇仲有唔知第三定第四屆的林楚麒(痴線，可唔可以搵人驗下我個腦，十二歲前電視圈全體藝員我認得哂)。
超人上優酷花兩個幾鐘頭飛快地睇哂35集(係35集，唔係第35集，我都覺得自己好勁)，得出的結論係而家啲劇集的而且確水準唔俾廿年前高，而且啲橋段不停翻炒(「流金歲月」劇情跟「我本善良」就有九成相似)，不過，廿年前的劇亦唔係記憶中咁「神」，其實都有唔少唔 re (reasonable) 的地方。
例如溫兆倫心情唔好駕車飛落幾十尺山崖，睇住佢架車筆直衝落山成架散哂，鏡頭一轉溫生竟然只係受輕傷爬番上山，仲只係受少少皮外傷，真係睇到笑咗出黎。
雖然劇情偶有唔re，不過論演員，普遍黎講又著實係以前的質素好啲。
溫生好戲唔在講，套劇佢一個人由頭帶到尾，曾江演黑道大佬一樣好有說服力。
曾江特別適合演邪中有情的角色，演黃藥師可謂不二之選。
佢離開無記之後梟雄角色幾乎都由秦沛去演，秦沛叔演技唔係唔好，不過就冇曾江嗰份邪氣的魅力。
近年連秦沛叔都走埋，梟雄重擔落在回流香港的岳華身上。
岳華叔演得都好，特別有種深藏不露的感覺，不過都係欠缺曾江叔嗰份「奸奸地」的吸引力。
羅樂林演固執老差骨同曾江不是冤家不聚頭都好到位，佢一向演 stubborn 的角色都入木三分，超人最記得佢喺「刑偵 IV」演佘詩曼個痴線老豆，真係癲到冇人有，睇到都「鄧」阿佘無奈。
超人一向都好推崇溫兆倫的演技，可以演奸仔、傻仔、好人、壞人，搞笑又得、公子哥兒又得，仲次次都演得好OK架喎。
無記咁多年黎唔係咁多小生有咁嘅造詣，撈家同郭晉安算係兩個，但佢地邊有溫生咁靚仔呀。
超人都唔明溫生點解咁欠觀眾緣，其實講私人形象大把風光(過)的男星差過佢啦。
吳啟華、陶大宇拍過三級片演技又唔好都紅到，超人又真係睇唔出溫生有咩唔及佢哋。
想當年超人仲讀緊小學，個個同學仔睇「今生無悔」都迷浪子程朗，只係得超人一個迷高天俊。
超人心諗，咩啫，乜靚仔工程師唔好過鐵騎浪子咩？亦都因為咁超人一啲都唔鍾意沈文薏，總覺得一日都係因為佢 BT (Bad Taste) 先搞到高天俊走上末路。
年紀小小就已經咁顛倒是非，超人都算叻，哈哈。
前陣子睇電視見到溫生同杜德偉仲喺台灣愛情劇演緊要角，溫生仲同啲廿幾歲妹妹仔如陳蕎恩合演情侶，都咪話唔驚。
雖然佢保養得好好，但話哂都年紀大到可以做蕎恩老豆，睇慣明道、阮經天同蕎恩演情侶，見到佢含情脈脈望住溫兆倫又真係覺得過分咗。
眼見林利同周海媚演一對都幾襯，反正蘇師傅話呢期行八運，柴九、雯女呢啲最煞食，無記幾時搵溫生回巢可以拍番海味、邵美琪呢啲老拍檔，整番套「今生無悔 2010」笑吓又夠好，起碼唔駛成日睇鄧見暈同 Toby 咁噁心。

崖上的波兒

一句講哂：笑到標眼水。