畢打自己人

其實超人真係冇認真睇過一集「畢打自己人」。
今晚難得早咗番屋企睇咗半集，呆咗。
我想問呢套「gei嘢」係咪專拍俾啲四十有幾，有事業但冇愛情的女主管睇？
我唔質疑毛姐保養得幾好，個角色可能都有其吸引力，但，呢個星球點會有三件事業有成的雄性動物一齊「冧」佢呀？？？
真係超現實到爆！
鄭子誠成個奸仔樣，我就當佢追毛姐係別有用心，你唔好話我知歐錦棠同柴九哥個冧樣係虛情假意！
嘩，我頂佢(請原諒我的粗魯)歐錦棠同柴九仲要係含情脈脈一副「愛在你心口難開」的樣子！真係睇到超人毛管「棟」！
唔好玩啦，小小超都同 Isabella 生仔啦，你唔見佢去追商天娥！
索到爆的黎姿都不過成為馬廷強太太，我唔係話馬生唔好，但睇表面證供馬生唔會高「大哥」同「社長」兩個角色幾班呱。
唔好講咁遠，就講番生活例子，超人就真係冇見過任何一個男高層會心儀一個女高層囉！
同行如敵國，唔整死你都算偷笑，做到盟友或朋友已經係奇葩。
男高層非禮女高層都尚且唔會啦，仲玩暗戀？
之前同事三分親 Vincent 暗戀咗黃花咁多年都已經超級唔合理(仲要話 Vincent 本身係情場浪子)，但人世間總有孽緣，都算。
而家毛姐個角色人見人愛、車見車載到咁，我覺得真係過分咗。
見住佢地幾個男人(仲要係全劇最好條件嗰幾個，唔係王祖藍同徐榮喎)扭盡六壬追亞「賞賞」，完全唔覺得浪漫不特止，直情一路睇一路嗌「痴線」！
請容許我用薛老渣渣哥的語氣講一句：齣齣都係痴線，真係好痴線呀~~

《MW 毒氣風暴》

真可憐，木村新劇《Mr Brain》播到第三集收視率急降至16%，仲俾17%的《Boss》爬頭。
舊年木村的《Change》已經不敵仲間由紀惠的《極度鮮師3》，今年又輸，木村神話正式破滅，對超人這個九十世代來說，不得不說句「絕望呀~~」。
不過話說回頭，連超人都覺得《Mr Brain》唔夠《Boss》好睇，各位日本觀眾的選擇似乎又不難理解。
當黎耀祥、鄧萃文同一班老戲班骨可以炒起一個李添勝老掉牙劇本之際，木村搭綾瀨遙再加水島Hiro竟然炒唔起一個《伽利略》搭《大搜查線》劇本，呢個世界冇永遠的偶像又一實證。
其實以戲論戲，舊年《Change》都仲好過今年《Mr Brain》，木村唔型仔(除咗首集開頭佢做鴨的造型外)、綾瀨唔可愛、水島成個傻仔咁，第三集龜梨和也同相武季紗啲戲非常唔掂，收視率急降不無道理。
如果《Mr Brain》再唔諗辦法執執個劇本，又或者執執木村個造型，仲有咁多集收視率仲有排佢跌。
講開木村，佢有份演出的電影《I come with the rain》拍好咗十九幾年今年終於上映，雖然主角係 Josh Hartnett 唔係佢，不過木村個角色都幾特別，成個耶穌咁，再加埋李秉憲卡士都算有啲睇頭(余文樂個角色本來搵吳彥祖做，吳彥祖因傷拍唔到，超人覺得 Daniel 紅過同好戲過余文樂好多囉)。
不過超人更期待千秋王子玉木宏同山田孝之主演的《MW 毒氣風暴》，千秋王子做變態姦殺狂徒，山田孝之係當年強暴(!!)咗玉木宏但現在變咗好人的神父，拼死阻止玉木宏害人，聽落劇情幾特別，不落俗套。
呢期鍾意野立參事官，即係竹野內豐，前幾日諗起當年都未睇完《星之金貨2》，所以上網重溫咗少少。
最後證明當年睇唔落去的劇，今日都係睇唔落去。
個劇本實在係太太太太搵戲黎做。
都唔係犯駁咁簡單，直情係徹頭徹尾唔合理。
秀一的性格「柯個」到不堪，加埋史上最黑仔的倉本彩，兩個人走在一起真係注定為呢個星球帶來不幸。
拓巳性格第一輯本來幾好，敢愛敢恨，到咗第二輯都「柯個」埋一份。
明明阿彩願意同佢一齊，無情白事佢又讓愛俾秀一。
阿彩又係詭異，明知矢上醫生奸到出汗(又唔明做乜矢上唔介意俾真面目阿彩睇，話哂佢係秀一兩兄弟最在乎的人)，又唔同秀一或拓巳講喎，眼白白睇住矢上入永世會接近佢兩兄弟……超人睇咗三份一已經發哂火，再一次睇唔落去。
有時間都係睇《人間的証明》算喇。
再唔係睇《巨星夫婿》，當年又係睇咗個頭無睇個尾，斷估唔會好似《星之金貨2》咁「柯個」，得啖笑都好。